„Неспособната власт со денови ги остави пациентите на Онкологија без лекови и соодветна терапија. И наместо да преземе одговорност, да формира штаб, веднаш да го реши проблемот од власта слушаме несериозни изговори и оправдувања, за својата неспособност обвинуваат други“ изјави Белкиса Зеќири, членка на Извршниот одбор на СДСМ.
Таа додаде дека овој случај потврдува оти во владата има луѓе без грам одговорност, без трошка човештво и грижа за граѓаните.
„Единствено што ги интересира е како да си ја спасат сопствената кожа а не како да помогнат на пациентите на кои животот им е загрозен. Одговорноста за голготата низ која поминуваат онколошките пациенти е целосно кај власта поради неодговорното и ненавремено планирање и финансирање на јавните набавки за овие лекови“ рече Зеќири.
Таа додаде дека за пациентите кои страдаат и го ризикуваат животот одговорни се директорот на Клиниката на Онкологија, Директорот на Фондот за здравство и министерот Тараври и никој друг поради што треба да понесат одговорност.
„Власта да не си поигрува со човечки животи и да не бара срамни оправдувања, пациентите од тоа немаат ништо, тие чекаат лек за живот. Директорот на Клиниката за Онкологија, Игор Стојковски, Директорот на Фондот, Сашо Клековски и министерот за здравство, Таравари, веднаш да поднесат оставки“ повика Зеќири.
Таа исто така побара владата да формира кризен штаб и итно да ја обезбеди потребната терапија, а потоа да направи долгорочен план за обезбедување на оваа животно потребна терапија.
„Никој нема право да загрозува животи, за голгота низ која поминуваат онколошките пациенти мора да има одговорност“ рече Зеќири.
ИЗВОР: racin.mk
