Десетици Перуанци се повредени во антивладините демонстрации низ државата, а затворен е и археолошкиот локалитет Мачу Пикчу каде се заглавени стотици туристи, пренесува Би-Би-Си. Според објаснувањето на Владата, туристичката атракција е затворена од безбедносни причини, а според неофицијалните информации заглавени се околу 400 лица, претежно туристи.
Тензиите во главниот град Лима се разгореа вчера кога полицајците употребија солзавец кон демонстрантите кои фрлаа стаклени шишиња и камења, додека гореа пожари на улиците во градот. „Гардијан“ пренесе дека во јужниот регион Пуно, околу 1.500 демонстранти нападнаа полициска станица, а запалена била и полициска станица во Зепита.
Протестите почнаа во декември минатата година откако претседателот Педро Кастиљо кој беше соборен, се обиде да го распушти законодавниот дом за да спречи гласање за импичмент.
Извор: 360stepeni.mk
