Заменик-шефот на администрацијата на Зеленски поднел оставка

Во објавата на Телеграм, соработникот на украинскиот претседател не ја наведува причината за оставката, но украинските медиуми јавуваат дека Тимошенко е можеби дел од кадровските смени што го најави Зеленски

Заменик-шефот на претседателскиот кабинет на Украина, Кирило Тимошенко, на почетокот на оваа недела побарал од претседателот Володимир Зеленски да го ослободи од должноста, јави Ројтерс.

Тој во објава на својот профил на Телеграм му се заблагодари на украинскиот претседател за довербата и за можноста, како што вели, за правење добри дела секој ден и секоја минута.

„Му благодарам на секој шеф на регионалните воени администрации. Вие сте вистински воини на светлината!Благодарност до градоначалниците за конструктивност во споровите. Благодарност до сите Украинци за довербата во нашата кауза. Благодарност до вооружените сили – што ја спасија и што ја бранат нашата земја. Благодарение на мојата сопруга и синот за разбирањето и поддршката“,

додава Тимошенко во објавата на Телеграм.

Во објавата на Телеграм, соработникот на украинскиот претседател не ја наведува причината за оставката, но украинските медиуми јавуваат дека Тимошенко е можеби дел од кадровските смени што го најави Зеленски.

Зеленски најави отпуштања од највисоко до најниско ниво во владата, регионите и безбедносните сили по наводите за корупција, речиси една година по руската инвазија.

„Веќе има одлуки за отпуштања – некои ќе се случат денеска, некои утре – што се однесуваат на функционери на различни нивоа во министерства и други владини структури, како и на регионално ниво и во органите за спроведување на законот“,

рече Зеленски во видеопорака.

Кирило Тимошенко (33) беше заменик-шеф на претседателската канцеларија на Зеленски од 2019 година, надгледувајќи ги регионите и регионалните политики. Тој, исто така, работеше со украинскиот претседател за време на неговата изборна кампања.

Од почетокот на руската инвазија во Украина во февруари 2022 година, според украинските медиуми, Тимошенко бил вмешан во неколку скандали поврзани со неговата лична употреба на скапи автомобили. Тимошенко, пак, ги отфрлил ваквите обвинувања.