Вучиќ: Пред Србија е тешка година – една од најтешките во модерната историја

Во сабота или недела ќе и се обратиме на јавноста со нови мерки и ќе кажеме што се бара и очекува од Србија во однос на Косово и санкциите против Русија, рече Вучиќ

Претседателот на Србија, Александар Вучиќ, во Давос изјави дека Србија се соочува со критична година, веројатно една од најтешките во модерната историја на политички и економски план.

Тој на Светскиот економски форум во Давос изјави дека од разговорот може да се види дека единственото нешто што сите ги интересира се санкциите против Русија и независноста на Косово.

Како што рече, в петок ќе се сретне со претставниците на Германија, Франција, САД, Италија и специјалниот пратеник на ЕУ за дијалог, Мирослав Лајчак, и оцени дека тоа ќе биде „многу, многу тежок разговор со светските најголемите сили“.

Тој додаде дека потоа ќе има консултации на државниот врв.

„Во сабота или недела ќе и се обратиме на јавноста со нови мерки и ќе кажеме што се бара и очекува од Србија во однос на Косово и санкциите против Русија“,

рече Вучиќ.

Запрашан за изјавата на косовскиот премиер Албин Курти дека може да се постигне договор во следните неколку месеци доколку има волја, Вучиќ рече: „Тоа може да се направи задутре, доколку се откаже од своите сецесионистички намери“.

Тој додаде дека Европскиот парламент усвоил резолуција во која делот за Косово е многу попроблематичен во однос на воведувањето санкции против Русија.

Како што рече, тие го поздравија барањето за членство на Косово во ЕУ, повикаа на интензивирање на процесот на дијалог заснован на взаемно признавање и ги осудија ескалирачките потези на Србија, како и констатираа дека независноста на Косово е неповратна и ги повикаа земјите членки кои го немаат признаено Косово да го сторат тоа.