Вучиќ: Ковачевски остро реагираше за Курти – за опозицијата тоа е антиевропска политика и потчинетост кон Србија

Ковачевски многу остро реагираше за тоа што Курти го направи во Тетово. Ова беа зборовите на српскиот претседател Александар Вучиќ во Атина кои ги пренесоа српските медиуми. Тој го изрази своето задоволство што Ковачевски жестоко го критикувал својот косовски колега.

„Видов кога Димитар Ковачевски остро му реагираше на Албин Курти за тоа што го направи во Тетово. Многу силно, јавно и отворено, и сакам да ги замолам нашите функционери, дури и кога немаат намера, да внимаваат да не им дадат нешто што некој би можел да го користи, за да ни направат и нам исто како Курти.“, рече Вучиќ.

Но, со кои зборови премиерот Ковачевски жестоко го критикувал својот колега Курти? ТВ21 испрати прашања до владината прес-служба за тоа што точно изјавил Ковачевски за Курти, но од таму без конкретен одговор.

„Во однос на Вашите прашања, Ве информираме дека Владата на Република Северна Македонија се залага за градење добрососедски односи со сите свои соседи. Взаемното почитување и добрососедските односи се предуслов за стабилен регион и во крајна линија се основа која обезбедува економски развој и подобри услови за живот за сите граѓани од сите земји од Западен Балкан. Оттука, стабилноста на регионот и зацртаната цел евроинтеграцијата остануваат на врвот на нашите приоритети.“, велат од Владата.

Во меѓувреме, за албанската опозиција средбата меѓу Ковачевски и Вучиќ и пораките дека ниту една земја не треба да ја навредува и оптоварува другата, не е дорбодојдена. Изет Меџити од Демократското движење вели дека Вучиќ секогаш кога има притисок да воведе санкции кон Русија, игра на картата на српскиот свет, вклучувајќи ја и Северна Македонија.

„Во моментот кога има сериозни најави од меѓународната заедница дека против Србија треба да се воведат санкции доколку таа не воведе санкции против Русија, да се сретнеш и да кажеш дека се „сјае“ во односите Србија – РСМ, се плашам дека тоа негативно може да се одрази и од меѓународен и од домашен аспект. Со оваа средба на Ковачевски и Вучиќ наместо да се дадат мировни пораки, тие го прават спротивното. Ковачевски ја покажува неговата потчинетост кон Србија, а другиот ја вклучи и Македонија во „српскиот свет„“, изјави Меџити.

Реагираше и Движењето Беса кои го повикуваат премиерот Ковачевски да се огради од просрпската и антиевропската политика. Инаку, појаснувањата меѓу Ковачевски и Вучиќ дојдоа по изјавите на српскиот министер за одбрана дека Северна Македонија и Црна Гора ја навредиле Србија и се мешаат во нејзините внатрешни работи по признавањето на Република Косово како независна држава.