Зборувајќи за седумте барања на родителите од училиштето, Вучиќ рече дека државата веќе презема или исполнува најголем дел од овие барања, а други наскоро ќе бидат исполнети или е подготвена да ги исполни
Претседателот на Србија, Александар Вучиќ, изјави дека Србија ќе ги прифати сите барања на родителите од училиштето „Владислав Рибникар“ во кое се случи масакрот во кој загинаа осум ученици и чуварот.
Зборувајќи за седумте барања на родителите од училиштето, Вучиќ рече дека државата веќе презема или исполнува најголем дел од овие барања, а други наскоро ќе бидат исполнети или е подготвена да ги исполни, јавува Б92.
„Сметаме дека се разумни. Во тешки времиња како ова, требаше да се разјаснат работите за да видиме како можеме да им помогнеме. Ќе ангажираме и светски експерти од норвешката амбасада бидејќи го имаа случајот со Брејвик, во кој беа убиени 77 лица. Да видиме како после тоа“,
рече Вучиќ.
И УНИЦЕФ ќе се вклучи, како што рече, „да видиме како сега после сè, да се справиме со посттрауматските синдроми“.
„Слушајќи ги експертите, ангажиравме и плативме за дополнителни трошоци на Институтот за ментално здравје во Белград. Ќе ги донесеме најдобрите експерти од Лос Анџелес и Норвешка да работат на поддршка на родителите и децата и да се извлечеме од оваа голема болка што не снајде“,
рече Вучиќ и додаде дека Србија ќе продолжи да вработува доволен број полицајци за децата да бидат безбедни на училиште.
Претседателот на советот на родители на ОУ „Владислав Рибникар“, Игор Ѓорѓевиќ, пред два дена презентира низа барања што ги имаат, а кои се упатени до надлежните органи.
Како што информира тој, врз основа на заклучоците што се донесени едногласно, изгласани се следните барања:
- Бараме реконструкција на настанот, објаснување како се случил, како тече истрагата и во која фаза е.
- Професионално да им објасни на родителите што ќе биде со момчето и каков е статусот на неговите родители бидејќи кај децата постои голем страв дека ќе биде на слобода.
- Тим од надворешни психолози и психијатри кои редовно ќе работат со учениците од 7-2 одделение без учество на училишниот педагог и психолог, заради обезбедување непристрасност. Родителите мора писмено да бидат информирани за програмата, како ќе работат со децата и да им бидат доставени биографиите на сите професионалци вклучени во програмата.
- Доколку се одлучи учебната година да се продолжи за 7-2 одделение, мора да се најде начин да не влегуваат во училиштето преку главниот влез и да имаат настава во една од училниците во близина на малиот излез.
- Бараме целосно реновирање на училиштето од 1 септември.
- Обезбедуваме целосна поддршка на целиот наставен кадар.
- Бараме да се утврди целосната одговорност на лицата кои го објавија списокот со имињата од 7-2 одделение кој го обиколи светот, како и сликите на децата и родителите и за тоа да бидат санкционирани.
Извор: 360stepeni.mk
