Вучиќ и Курти на 27 февруари повторно ќе седнат на заедничка маса во Брисел

Предвидено е Борел и специјалниот претставник на ЕУ, Мирослав Лајчак, да имаат одвоени средби со лидерите на Србија и Косово, по што ќе следува заедничката средба

Српскиот претседател Александар Вучиќ и премиерот на Косово ќе се сретнат во Брисел на 27 февруари, соопшти денеска Европската Унија.

Домаќин на средбата ќе биде високиот претставник за надворешна политика на ЕУ, Жозеп Борел, на која ќе стане збор за предлогот на Унијата за нормализација на односите меѓу Косово и Србија.

Вучиќ и Курти, како што се наведува во соопштението, го потврдиле своето учество на средбата.

Предвидено е Борел и специјалниот претставник на ЕУ, Мирослав Лајчак, да имаат одвоени средби со лидерите на Србија и Косово, по што ќе следува заедничката средба.

„Во понеделник, 27 февруари, високиот претставник/потпретседател Жозеп Борел ќе свика состанок на високо ниво на дијалогот Белград-Приштина во Брисел. Своето учество го потврдија претседателот на Србија, Александар Вучиќ и премиерот на Косово, Албин Курти. Високиот претставник, поддржан од специјалниот претставник на ЕУ, Мирослав Лајчак, ќе има одвоени средби со лидерите, по што ќе следи заедничка средба. На средбата ќе стане збор за предлогот на ЕУ за нормализација на односите меѓу Косово и Србија“,

се наведува во соопштението на ЕУ.

Ова ќе биде прва средба на лидерите на Косово и Србија годинава по тензиите кои доминираат во односите од летото минатата година, а се одразија и на настаните на терен.

Курти и Вучиќ последен пат се сретнаа на 21 ноември минатата година. Средбата беше неуспешна, а Борел одговорноста за пропаѓањето на преговорите ја префрли на премиерот на Косово.

Белград и Приштина водат дијалог за нормализација на односите од 2011 година со посредство на Европската Унија, но и двете страни имаат поинаков став во врска со конечниот договор. Додека Приштина инсистира на меѓусебно признавање, Белград бара компромисно решение.

За Белград формирањето на Заедницата на српски општини е клучна точка за продолжување на дијалогот.

Косово и Србија го прифатија предлогот на Европската Унија, кој во јавноста е познат како француско-германски план за нормализација на односите.

Планот, според она што е познато во јавноста, предвидува почитување на територијалниот интегритет, еднакви права, признавање на државните симболи и посебен третман на српската заедница на Косово.

Во документот не се споменува експлицитно меѓусебното признавање на Косово и Србија, како и членството на Косово во Обединетите нации, но од Србија се бара да не се меша во членството на Косово во меѓународните организации.