Во 10 провинции погодени од катастрофалните земјотреси прогласена е вонредна состојба, а до 12 февруари ќе трае и седумдневната националната жалост
Претседателот на Турција, Реџеп Таип Ердоган, прогласи вонредна состојба за следните три месеци во 10 провинции погодени од катастрофалните земјотреси.
„Одлучивме да прогласиме вонредна состојба за да се осигуриме дека нашата спасувачка операција може да се изврши брзо“,
рече Ердоган во телевизиско обраќање.
Тој додаде дека Турција планира да отвори хотели во туристичкиот центар Анталија за привремено сместување на луѓето погодени од земјотресите.
Ердоган рече дека 70 земји понудиле помош во операциите за пребарување и спасување.
Турција прогласи и седумдневна национална жалост по смртоносните земјотреси кои погодија неколку југоисточни провинции и во кои загинаа најмалку 5 000 луѓе.
„Поради земјотресите што се случија прогласена е национална жалост во траење од седум дена и ќе трае до недела 12 февруари“,
напиша Ердоган на Твитер.
Во катастрофалниот земјотрес што вчера ја погоди југоисточна Турција, се урнаа неколку илјади згради, а потрагата на преживеаните под рушевините е отежната и поради минусните температури и близу 200 последователни потреси. Според последниот црн биланс, во земјотресот загинати се над 5 000 луѓе.
Според информациите што ги објави Си-ен-ен, во Турција се загинати вкупно 3 419 лица, а во Сирија бројот на загинати се искачи на 1 602. Како последица на земјотресот, во двете земји се повредени над 23 000 лица.
Обединетите нации соопштија дека земјотресот со јачина од 7,8 степени според Рихтеровата скала што ја погоди јужна Турција рано во понеделникот е најсилниот земјотрес во ова подрачје во повеќе од 80 години, односно од 1939 година.
Извор: 360stepeni.mk
