КАРТУМ (АА) – Жестоки судири повторно избија денес меѓу суданската Армија и паравоените Сили за брза поддршка (РСФ) и покрај нивните преговори во Саудиска Арабија за прекин на огнот, јавува Анадолу.
Според очевидци, вооружените судири се случиле во областа Ал Шакилаб, јужно од Картум, и во населбата Карари во градот Омдурман.
Припадниците на двата воени ривали се судрија и западно од мостот Халфаја, што ги поврзува Омдурман и градот Бахри, северно од Картум.
Сè уште нема информации за жртви.
Судирите се случија во време кога траат преговорите меѓу претставниците на Армијата и РСФ во саудискиот град Џеда за постигнување прекин на огнот и решавање на нивниот спор.
Повеќе од 832 цивили загинаа, а илјадници се повредени од почетокот на судирите на 15 април, соопштија локалните медицински претставници.
Несогласувањата меѓу двете страни се разгореа во последните месеци околу интеграцијата на РСФ во вооружените сили на Судан, клучен услов од договорот за транзиција во Судан со политичките групи.
Судан е без функционална влада од октомври 2021 година, кога војската ја собори преодната Влада на премиерот Абдула Хамдок и прогласи вонредна состојба, потег што политичките сили го оквалификуваа како „државен удар“.
Транзицискиот период на Судан, што започна во август 2019 година по соборувањето на претседателот Омар ал-Башир, требаше да заврши со избори на почетокот на 2024 година.
Извор: www.aa.com.tr
