Исто така, производителите се должни 70 отсто од производството на јајца да го пласираат на домашниот пазар. Одлуката опфаќа и обврска трговците редовно да прибавуваат свежи јајца од кокошка во количини што редовно ги произведувале во јануари и февруари
На околу еден месец пред Велигден и Бајрам, Владата одлучи да ги замрзне цените на јајцата од кокошка и оризот и да го ограничи извозот на јајцата.
Одлуката ја соопштија премиерот Димитар Ковачевски и министерот за економија Крешник Бектеши по денешната владина седница.
Цените се замрзнуваат на нивото на кое биле на 15 март, што значи дека не може да се продаваат по повисоки цени од тие што биле на тој датум.
„Донесовме одлука за понатамошно замрзнување на цените, меѓу кои јајцата од кокошка и оризот. Нивните највисоки цени ќе останат на нивото на цените кои се применувале на 15 март 2023 година со важност до 30 април 2023 година. Трговците кои се регистрирани да вршат трговска дејност имаат обврска редовно да прибавуваат и да продаваат свежи јајца од кокошка во количини што редовно се прибавувале во јануари и февруари 2023 година“,
рече Ковачевски.
Тој посочи дека изминатиот период утврдиле дека има значаен пораст на цените на оризот и јајцата како резултат на движењата во однос на извоз и увоз на овие производи. Затоа, производителите на јајца, согласно одлуката, сега имаат обврска 70 отсто од производството да го пласираат на домашен пазар што ќе значи дека можат да извезуваат максимум 30 отсто од производството.
„Во пресрет на претстојните празници Велигден и Бајрам, со цел да се спречи евентуален дисбаланс на домашниот пазар и недостиг на јајца од кокошка, производителите најмалку 70 проценти од домашното производство на јајца ќе го пласираат на домашниот пазар, а трговците на мало да продолжат да ја набавуваат вообичаената количина на јајца што се набавувала во јануари и февруари 2023“,
рече премиерот.
Мерката, нагласи тој, е базирана на аргументирани факти и анализи кои се направени изминатиот период.
Ова е трета последователна одлука за замрзнување на цени годинава.
На владина седница на 28 февруари беше одлучено да се замрзне цената на белиот и полубелиот леб со тежина од 450 грама и повеќе на максимални 33 денари.
Од 16 март, пак, Владата ги замрзна цените на тестенините и на млечните производи. Согласно оваа владина одлука, цените на макароните и шпагетите се намалија за 15 отсто, а на млечните производи (кравјо млеко, урда, сирење, кашкавал, павлака и јогурт) за 10 отсто од однос на цените кои биле на 1 март.
ИЗВОР: 360stepeni.mk
