Во Грција завршува потрагата по исчезнатите во железничката несреќа

Шефот на железничката станица од каде што требало да се регулира движењето на возовите денеска е пред обвинител

Грчките спасувачи сè уште ги пребаруваат остатоците од возовите што се судрија во вторникот, но се очекува денеска да ја завршат операцијата за спасување.

Во железничката несреќа кај преминот Темпи во близина на Лариса, која се смета за најтешка во Грција досега, загинаа најмалку 57 патници, а десетици се повредени. Тие настрадаа во директен судир на патнички воз со повеќе од 350 патници и товарен воз што се наоѓал на истата пруга.

Шефот на железничката станица од каде што требало да се регулира движењето на возовите денеска е пред обвинител. Против него е поднесена кривична пријава за попречување на превозот и за загрозување животи.

Уапсениот, кој се товари, меѓу другото, и за убиство од небрежност во четвртокот побара и доби тридневен период за подготовка, а неговиот адвокат за грчките медиуми рече дека 59-годишникот направил грешка, презема одговорност, но само за делот што се однесува на него.

Катастрофата во централна Грција предизвика револт и протести низ целата земја, како и преиспитување на безбедносните стандарди во железничкиот систем.

Според властите, причината за несреќата била човечка грешка, но синдикатите на железницата велат дека таа била неизбежна поради неодржуваната и неисправна сигнализација.

Идентификувани се 54 тела од лицата што досега беа пријавени од роднините како исчезнати. Полицијата соопшти дека тие биле идентификувани преку ДНК тестови, бидејќи несреќата била многу насилна и била невозможна поинаква идентификација.

Возот патуваше од Атина кон Солун и беше полн со студенти што се враќале од патување по продолжениот празничен викенд.

Семејствата на загинатите и на исчезнатите бараат правда, а железничарите штрајкуваат.

„Ова е многу тешка ситуација. Ќе видиме како ќе постапиме законски, но за ништо нема да попуштиме. Семејствата бараат одговорните да не се извлечат“,

изјавил еден роднина за грчкото радио СКАИ.

Железничките синдикати, пак, почнаа 24-часовен штрајк во средата, а во петокот го продолжија за 48 часа., барајќи јасен распоред од Владата за спроведување безбедносни протоколи.

Вчера имаше судир меѓу полицијата и демонстрантите, откако 2.000 студенти излегоа на улиците во Атина, блокирајќи го патот пред парламентот и одржувајќи едноминутно молчење. Студентски протести имаше и во Лариса и во Солун.