Сношти во Битола, со црвен тепих и проекција на италијанскиот филм „Партенопе“ во режија на Паоло Сорентино, се отвори 45 издание на Фестивалот на филмска камера „Браќа Манаки“.
„Оваа година наши учесници и гости на фестивалот се мајстори на филмската фотографија кои заедно имаат освоено 8 Оскари, 16 номинации за Оскар, 12 награди БАФТА и уште 19 номинации за истата награда, 11 награди од Американското друштво на кинематографери, 8 награди од Британското друштво на кинематографери, 6 награди на Канскиот филмски фестивал, 1 награда во Венеција, 3 награди во Берлин, 6 ЕМИ награди, 1 азиски Оскар. Сите овие луѓе годинава ќе шетаат по улиците на Битола, ќе шетаат по Широк сокак. Ете затоа еден е ‘Манаки’ и една е Битола, како голем центар на филмската уметност“, рече директорот на Фестивалот, актерот Симеон Мони Дамевски.
Дамевски додаде оти фестивалот годинава доделува почесна Златна камера 300 за животно дело на Јанаки Манаки, бидејќи досега вакво признание било доделено само на неговиот брат Милтон.
„Првпат мојот татко ја прими наградата Златна камера 300 во името на неговиот татко, Милтон Манаки. Фестивалот ‘Браќа Манаки’ е уникатен фестивал. Еден од малкуте фестивали кои ги слават кинематограферите. Голема чест, задоволство и благодарност од семејството кое ја прима оваа награда“, рече внукот на Милтон Манаки кој се вика исто како и неговиот дедо.
Наградата Златна камера 300 за животно дело ја доби францускиот кинематографер, Бруно Делбонел.
Наградата Специјална камера 300 за особен придонес во светската филмска уметност ја доби полската кинематограферка, Јоланта Дилевска (Фото: „Браќа Манаки“
„Голема благодарност на Фестивалот. Кога Симеон ме повика, реков дека нема шанса да дојдам, уште не сум се пензионирал. Им се восхитувам на досегашните добитници на ова признание, како Свен Никвист, Ед Лакман, Виторио Стораро, Питер Бижу, Џон Сил. Тоа се луѓе од кои многу сум научил и многу им должам. Сега се обидувам да му го дадам на киното она што киното ми го даде мене“, рече Делбонел.
Наградата Специјална камера 300 за особен придонес во светската филмска уметност ја доби полската кинематограферка, Јоланта Дилевска. Наградата што ја доделува Друштвото на филмски работници на Македонија (ДФРМ)- „Голема ѕвезда на македонскиот филм“, ја доби Димитар Грбевски, македонски филмски и телевизиски монтажер. Наградата ја додели Владимир Павловски, студент на Грбевски.
„Неговите студенти со своите филмови се амбасадори на македонската култура на најголемите фестивали во Кан, Венеција, Берлин, Санденс, вклучително и, ‘Медена земја’ со две номинации за Оскар“, рече Павловски. „Да им посакаме на младите да го следат патот на филмските дејци“, рече Грбевски .
Кинематографер на италијанскиот филм „Партенопе“ со кој се отвори Фестивалот е Дариа Д’ Антонио.
ИЗВОР: sdk.mk
