(ВИДЕО) Русинката која Хаг сака да ја уапси зборуваше на состанокот на ОН, некои ја напуштија салата

Лавова-Белова присуствуваше на неформалниот состанок на Советот за безбедност на ОН кој го свика Русија за да разговара за евакуација на украинските деца од зоната на конфликтот. Русија го презеде претседавањето со Советот за безбедност на 1 април

Емисари од неколку западни земји вчера ја напуштија седницата на Обединетите нации на која говореше руската комесарка за правата на децата, Марија Лавова-Белова, која Меѓународниот кривичен суд (МКС) сака да ја уапси за воено злосторство – илегална депортација на малолетници. Да потсетиме, МКС на 17 март издаде налози за апсење на рускиот претседател Владимир Путин и Марија Лавова-Белова за воено злосторство илегално депортирање деца од територијата на Украина окупирана од руските сили.

Лавова-Белова присуствуваше на неформалниот состанок на Советот за безбедност на ОН кој го свика Русија за да разговара за евакуација на украинските деца од зоната на конфликтот. Русија го презеде претседавањето со Советот за безбедност на 1 април.

„Додека Русија претседава со Советот за безбедност, ние ќе ја искористиме секоја можност да се спротивставиме на нивната употреба на позицијата за ширење дезинформации“,

рече Линда Томас-Гринфилд, амбасадор на САД во ОН.

Таа додаде дека САД и Велика Британија го блокирале преносот на состанокот преку интернет, така што Лавова-Белова не добила „меѓународна платформа за ширење дезинформации и обид за одбрана на своите ужасни активности во Украина“.

Претставниците на САД, Велика Британија, Албанија и Малта ја напуштија конференциската сала за време на говорот на Лавова-Белова.

Рускиот пратеник Василиј Небензија рече дека ова е јасен показател за „нивната рамнодушност кон судбината на децата од Донбас и Украина“.

Украина ја обвинува Русија дека „украла“ повеќе од 16 000 деца од почетокот на нејзината офанзива пред повеќе од една година. Русија вели дека ги „спасува“ децата од борбените зони и оти има процедура за нивно повторно спојување со нивните семејства.

Москва не ја крие програмата според која донесе илјадници украински деца во Русија, но ја претставува како хуманитарна кампања за заштита на сирачињата и децата напуштени во воената зона.