ВИДЕО: Прв натпревар во Турција по земјотресот, фудбалот во втор план – Трогателна порака се појави на трибините

На стадионот „Шенол Гунеш“ денеска во Конференциската лига се одигра натпреварот меѓу Трабзонспор и Базел, кој е првиот голем спортски настан во Турција по страшниот земјотрес.

Навивачите на Трабзон пред натпреварот изведоа специјална кореографија со голема фигура на спасител на чиј шлем се знамињата на некои земји кои им дојдоа на помош на Турците. Беше истакната порака: „Ќе бидеме заедно, ќе си ги преврземе раните“.

И швајцарскиот тим свесен за деликатниот момент испрати трогателна порака до домаќините пред натпреварот.

-Во вакви моменти фудбалот останува во втор план. На нашето патување мислите ни се со жртвите од земјотресот и затоа ќе објавуваме само црно-бели фотографии“.

Исто така, Трабзон реши, а Базел поддржа, да нема славје на теренот доколку се постигне гол.

-Дефинитивно ќе се приклучиме на тоа и ќе им кажам на играчите дека ја почитуваме таа одлука. Ќе им кажам дека не славиме ако постигнеме гол, изјави Хајко Вогел, тренерот на Базел.

Емотивен беше и тренерот на Трабзон, Абдула Авчи.

-Ќе го одиграме најтешкиот натпревар во нашите животи. Имаме многу болки… Само сакаме да помогнеме да залечиме некои рани што е можно повеќе со обединувачката моќ на фудбалот. Сакам да им заблагодариме на спасувачките тимови од целиот свет кои дојдоа и им благодариме на сите што ни подадоа рака на помош, рече тој.