Околу 70 германски полицајци се повредени во судирите со илјадници демонстранти кај селото Луцерат, во западна Германија. Бројките ги обелодени германската полиција.
Според полицијата, кај Луцерат се собрани 15 000, додека според демонстрантите 35 000 луѓе. Тие се противат на најавеното проширување на блискиот рудник за јаглен, што ќе значи целосно уривање на селото. Меѓу демонстрантите, од денеска е и шведската еко-активистка, Грета Тунберг.
Од друга страна е полицијата која се обидува да ги отстрани демонстрантите, пред се еко-активисти, кои сметаат дека проширувањето на рудник со јаглен е се само не решение за енергетската криза. Според полицијата, против 150 лица веќе се покренати соодветни постапки.
Според извештаите на германските медиуми, ситуацијата се менува од час во час – од мирна до насилна.
Освен што го отвора прашањето за прифатливоста на одредени извори на енергија, „војната“ во Луцерат која трае веќе неколку дена, е исклучително важна и за владејачката коалиција каде канцеларот Олаф Шолц е во партнерство со зелените партии. Активистите ги обвинуваат „зелените“ дека не си ги исполниле ветувањата.
Владата засега го брани проширувањето на рудникот во име на енергетска безбедност на Германија. Земјата мора повторно да се потпира и на јаглен, за да се надокнади прекинот на испораката на гас од Русија.
Извор: 360stepeni.mk
