Откако беше објавена веста дека Зеленски го потврдил падот на Бахмут, дојде корекција од портпаролот на претседателот, Сергеј Никифоров
Денес одекна веста дека Володимир Зеленски го потврди падот на Бахмут. Во Хирошима, на состанокот со светските лидери и членовите на Г-7, украинскиот претседател навести дека украинскиот град паднал под целосна контрола на Русите, во одговор на новинарско прашање.
Но, набргу откако сите релевантни светски медиуми внимателно ја објавија веста, дојде корекција од портпаролот на претседателот, Сергеј Никифоров. Како што може да се слушне и да се види на снимката подолу, новинарот го прашува Зеленски: „Дали Бахмут сè уште е во украински раце“, а потоа го додава вториот дел од прашањето – „Русите велат дека ја презеле контролата врз Бахмут“. На тоа Зеленски одговори со: „Мислам дека не“, што може да се толкува на два начина – дека градот повеќе не е под украинска контрола, но и дека Русите не го окупирале целосно.
Zelensky’s statement was commented on by his press secretary Sergei Nikiforov, stressing that the president denied the loss of Bakhmut. Reporter question:
– The Russians said they took Bakhmut.
Zelensky’s response:
– I think not. #Bakhmut #Russia #Ukraina #Zelensky pic.twitter.com/91DFGZOGna
— Animal World (@dragon_of_time_) May 21, 2023
Сергеј Никифоров, портпаролот на украинскиот претседател, брзо реагираше и ги отфрли тврдењата дека Бахмут паднал, сугерирајќи во овој дел дека Зеленски всушност одговорил: „Мислам дека не“ на вториот дел од прашањето на новинарот, кој се однесува на руската контрола врз украинскиот град.
„Треба да разберете дека (таму) нема ништо. Денес Бахмут е сè уште само во нашите срца“,
рече Зеленски во својот прилично нејасен одговор.
Русија вчера соопшти дека целосно го освоила источниот украински град, што, доколку е вистина, ќе го означи крајот на најдолгата и најкрвавата битка од 15-месечната војна.
Путин им го честиташе освојувањето на Бахмут на војниците
Руското Министерство за одбрана накратко објави: „ослободувањето на Артјомовск е завршено како резултат на нападот на јуришните одреди „Вагнер“, со поддршка на артилерија и воздухопловни сили“.
Рускиот претседател Владимир Путин им честиташе на војниците за заземањето на градот велејќи дека најзаслужните ќе бидат наградени, пренесоа руските агенции.
Вчера Пригожин го држеше руското знаме и рече дека Бахмут е под руска контрола
Нападот врз претежно срамнетиот град беше предводен од платеничките трупи на групата „Вагнер“, чиј лидер Евгениј Пригожин претходно вчера изјави дека неговите сили конечно ги потиснале Украинците од последната област во градот. Шефот на „Вагнер“ ова го изјави во видео на кое стои пред борците на „Вагнер“ во воена униформа, а тие истакнуваат руски знамиња и транспаренти на платеничката група.
„Денеска во 12 часот Бахмут беше целосно окупиран. Го окупиравме целиот град, секоја куќа“,
изјави вчера Пригожин.
— Zlatti71 (@djuric_zlatko) May 20, 2023
Украина брзо го демантира Пригожин, а тој се потсмеваше на Зеленски
Но, портпаролот на украинската војска Серхи Шереваџи изјави за Ројтерс дека тоа не е вистина и дека украинските трупи сè уште се борат во Бахмут. Заменик-министерот за одбрана рече дека се водат жестоки борби и дека ситуацијата е критична.
Бахмут е во фокусот на најдолгата и најкрвавата битка во руската војна во Украина, која трае речиси 15 месеци.
Во заднина се слушаа далечни експлозии додека Пригожин зборуваше на видеото. Меѓу другото, тој рече дека неговите сили ќе се повлечат од Бахмут од 25 мај на одмор и преквалификација и дека контролата ќе ѝ ја предадат на редовната руска армија.
Пригожин во видеото ги исмева украинскиот претседател Володимир Зеленски и американскиот претседател Џо Бајден, кои учествуваа на самитот на Г-7 во Јапонија во саботата. Главна тема на разговор меѓу светските лидери беше војната во Украина.
Обраќајќи му се на Зеленски, Пригожин рече:
„Кога ќе го видите Бајден денес, бакнете го на врвот од главата и кажете му дека го поздравив“.
Пригожин ги повтори поплаките што често ги искажуваше во минатото. Тој рече дека неговите сили претрпеле многу поголеми загуби бидејќи руската армија не гарантирала соодветна поддршка или снабдување со муниција.
Претходно месецов тој се закани дека ќе ги повлече своите војници.
Објавата на Пригожин за победата уследи по жестоките борби околу Бахмут од минатата недела, при што Украина извести дека потиснала дел од руските сили.
Извор: 360stepeni.mk
