Санкции од Велика Британија ќе има и кон 86 поединци и организации поврзани со рускиот енергетски, метален, одбранбен, транспортен и финансиски сектор – зголемувајќи го притисокот врз преостанатите приходи на Путин и обидите да ги искористи овие сектори за воената поддршка
Велика Британија и ЕУ воведуваат нови санкции против Русија. Санкциите се однесуваат за повеќе сектори, а целта е да се намали капацитетот на Москва за финансирање на војната во Украина.
„Санкциите се насочени кон 86 поединци и организации поврзани со рускиот енергетски, метален, одбранбен, транспортен и финансиски сектор – зголемувајќи го притисокот врз преостанатите приходи на Путин и обидите да ги искористи овие сектори за воена поддршка“,
се вели во соопштението од британското Министерство за надворешни работи.
Соопштението доаѓа додека британскиот премиер Риши Сунак се состанува со лидерите на Г-7 во Хирошима.
Претходно од кабинетот на премиерот соопштија дека Обединетото Кралство ќе го забрани увозот на руски дијаманти, бакар, алуминиум и никел од руско потекло според законот што ќе биде воведен подоцна оваа година, пренесува Си-ен-ен.
Велика Британија санкционира повеќе од 1 500 поединци и организации од почетокот на руската инвазија на Украина замрзнувајќи повеќе од 22,3 милијарди долари имот во Велика Британија.
„Како што покажуваат денеска објавените санкции, Г-7 ќе остане обединета пред руската закана и цврста во поддршката за Украина“,
изјави британскиот премиер Риши Сунак.
Шефовите на држави и влади на Г7, исто така, треба да разговараат за низа други санкции против Русија, вклучително и американските мерки за ставање на 70 руски и странски ентитети на црната листа на САД. Британија, исто така, ќе таргетира дополнителни 86 лица и компании од воено-индустрискиот комплекс на Путин, покрај оние кои се вклучени во енергетската, металната и бродската индустрија, се вели во извештајот.
Претседателот на Европскиот совет Шарл Мишел рече дека и Европа ќе воведе санкции за руските дијаманти.
Извор: 360stepeni.mk
