Уставниот суд на Грузија го отфрли барањето на претседателката за поништување на изборните резултати

ИСТАНБУЛ (АА) – Уставниот суд на Грузија денес го отфрли барањето на претседателката Саломе Зурабичвили за поништување на резултатите од спорните парламентарни избори одржани во октомври, јавува Анадолу.

Во одлуката, што беше донесена минатиот петок, но објавена на веб-страницата на судот денес, се вели дека тжбата поднесена од Зурабичвили нема да биде прифатена за „суштинско разгледување“.

Судот отфрли уште една тужба поднесена од 30 опозициски пратеници во врска со изборните резултати, според кои партијата Грузиски сон го освои мнозинството.

Одлуката е конечна и не може да се поднесе жалба, се додава во решението.

Зурабичвили на 19 ноември поднесе тужба до судот за поништување на резултатите од изборите на 26 октомври. Грузиски сон освои мнозинство од 89 места во 150-члениот парламент, откако доби 53,93 отсто од гласовите.

Претставниците на Грузиски сон, вклучително и премиерот Иракли Кобахиџе и почесниот претседател на партијата, Биџина Иванишвили, ги поздравија резултатите.

Но, Зурабичвили рече дека не ги признава резултатите, тврдејќи дека гласањето било нарушено со руско мешање. Опозициските партии ги означија изборите како „украдени“, а имаше и протести против Владата, која ги прекина преговорите за пристап во Европската Унија (ЕУ).

Претседателката сѐ уште не ја коментираше одлуката на судот.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.