Израелската армија соопшти дека убила тројца високи претставници на военото крило на радикалната палестинска група
Најмалку 12 лица се убиени, а 20 се ранети во текот на ноќта во израелските воздушни напади врз цели на Исламскиот џихад во Појасот Газа, јави Асошиеjтед прес (АП), повикувајќи се на медицински извори во крајбрежната енклава, пренесува БТА.
Палестинските здравствени власти соопштуваат дека меѓу загинатите има три жени и три деца.
Израелската армија соопшти дека убила тројца високи претставници на военото крило на радикалната палестинска група. Групата ги идентификуваше убиените команданти како Џихад Ганам, Калил Ал Бахтини и Тарек Иззелдин. Според израелската војска, тројцата се одговорни за неодамнешната ракетна стрелба врз земјата.
Од армијата соопштија дека целеле на 10 локации за производство на оружје и инфраструктура, вклучувајќи работилници за производство на ракети и локација за правење бетон што се користи за тунели.
Во очекување на ракетен напад како одговор на убиствата, израелската војска ги повика граѓаните кои живеат во градовите на 40 километри од Газа да останат во близина на засолништата, пренесува Гардијан.
Милитантните групи рекоа дека ќе одговорат на нападите.
„На бомбардирањето ќе биде одговорено со бомбардирање, а на нападот ќе биде одговорено со напад“,
ја пренесува Гардијан изјавата на Тарек Селми, портпарол на Исламскиот џихад.
Исламски џихад е втората највлијателна вооружена група во Појасот Газа по Хамас, исламистичкото движење кое ја контролира енклавата.
Извор: 360stepeni.mk
