АНКАРА (АА) – Туркије силно ја поддржа изјавата на Министерството за надворешни работи на Турската Република Северен Кипар (ТРСК) за закотвувањето на американскиот разурнувач УСС Арли Бурк во пристаништето на кипарските Грци, јавува Анадолу.
„Како што постојано нагласувавме заедно со ТРСК, чекорите преземени во регионот од страна на Соединетите Американски Држави, кои ја нарушуваат рамнотежата на сметка на страната на кипарските Турци, ја оштетуваат долгогодишната неутрална позиција на таа земја во однос на островот и претставуваат пречка за праведно, одржливо и трајно решавање на кипарското прашање“, се вели во соопштението на турското Министерство за надворешни работи.
Министерството ги повика САД да ги преиспитаат овие политики.
Во соопштението се повторува посветеноста на Туркије, како држава гарант на островот, да ги заштити легитимните права и интереси на кипарските Турци под сите околности и услови.
– Повеќедецениски спор –
Кипар се наоѓа во повеќедецениски спор меѓу кипарските Грци и кипарските Турци, и покрај серијата дипломатски напори на Обединетите нации (ОН) за постигнување сеопфатно решение.
Етничките напади што започнаа во раните 1960-ти години ги принудија кипарските Турци да се повлечат во енклавите заради нивна безбедност.
Во 1974 година државниот удар на кипарските Грци, чија цел беше грчка анексија на островот, доведе до воена интервенција на Туркије како земја гарант за заштита на кипарските Турци од прогон и насилство. Како резултат на тоа, во 1983 година основана е Турската Република Северен Кипар (ТРСК).
Во последните години имаше неколку обиди за мировен процес, вклучително и неуспешната иницијатива во 2017 година во Швајцарија под покровителство на земјите гаранти Туркије, Грција и Велика Британија.
Администрацијата на кипарските Грци влезе во Европската Унија во 2004 година, истата година кога кипарските Грци го спречија планот на ОН за ставање крај на долгогодишниот спор.
Извор: www.aa.com.tr
