ТЕЛ АВИВ (АА) – Најмалку три лица се повредени во пукање во центарот на Тел Авив, каде синоќа се одржаа масовни протести поради планот на израелската влада за реформи во судството, јавува Анадолу.
Израелската полиција соопшти дека на улицата Дизенгоф во центарот на Тел Авив се случил вооружен напад. Се наведува дека полицајците го неутрализирале напаѓачот, кој отворил оган врз пешаците што се движеле по улицата и ранил три лица.
Здравствената состојба на еден од повредените е тешка, додека другите двајца се полесно повредени, информираше полицијата.
Во соопштението на израелската служба за итна помош, се наведува дека здравствените работници им укажале прва помош на повредените, а потоа биле префрлени во болницата „Ичилов“.
Во Израел од вчера се одржуваат масовни протести ширум земјата, особено во Тел Авив, во знак на протест против планот на израелската влада за реформи во судството, што опозицијата го смета за обид за намалување на овластувањата на судските власти во корист на извршната власт.
Извор: www.aa.com.tr
