Двајца мажи и една жена загинаа во руското гранатирање на градот Херсон во јужниот дел од Украина, соопштија регионалните власти. Во нападот се оштетени голем број на инфраструктурни објекти, а покрај загинатите има и 6 ранети лица.
Украинските власти велат дека во рускиот напад се оштетени клиничката болница, автобуската станица, училиште, банка, станбени згради и поштата.
Херсон од почетокот на воената инвазија, до ноември годинава беше под окупација на руската армија. Од ноември се врати во рацете на украинските сили и е константна цел на ракетирање од страна на Русија.
Инаку, вчера Три лица загинаа, а уште две беа повредени откако руските сили нападнаа станбена област во градот Константиновка во источна Украина. Гувернерот на Доњецк,Кириленко, наведе дека се оштетени четири станбени згради и еден хотел.
„Спасувачките екипи и полициските службеници се на местото на настанот за внимателно документирање на уште едно злосторство на руските окупатори“,
изјави Кириленко.
Претходно Кириленко објави дека четири лица загинале, а најмалку седум се ранети од руското гранатирање во последните 24 часа. Украинскиот претседател Володимир Зеленски рече дека ситуацијата на фронтот и понатаму е „исклучително тешка“, особено во источниот регион Доњецк, каде Русија ја засилува својата офанзива како дел од нејзината целосна инвазија која започна во февруари минатата година.
Извор: 360stepeni.mk
