Измешани чувства, но не и страв, преовладуваат кај дел од патниците кои утрово, од Атина за Солун тргнаа со патничкиот воз, прв по пауза од 34 дена по железничката несреќа кај месноста Темпи во која животот го загубија 57 лица.
На железничката станица во Атина, околу 80 патници чекаа да се качат во возот. Меѓу нив и странски туристи кои велат дека возовите, сатистички е докажано дека се едно од најбезбедните превозни средства, но и Грци кои често ја користат конкретната линија.
Со оглед на тоа дека од директниот судир на двата воза во железничката несреќа на 28 февруари, најпогодени беа првите вагони, сега, некои од патниците, иако веат дека не чувствуваат страв, сепак одбрале седишта во последните вагони.
Патничкиот воз планирано е да се движи со намалена брзина во споредба со претходно и затоа до Солун ќе патува пет и пол часа наместо четири часа и 20 минути колку што беше претходно.
После градот Лариса, возот ќе помине и од делот каде што се случи несреќата, а се очекува машинвозачот да ја намали брзината за да им оддадат почит на загинатите.
Рано утрово, тргна и првиот патнички воз за Калабака со 200 патници, а меѓу нив беше и државниот министер кој сега ја извршува функцијата министер за транспорт и инфраструктура Јоргос Герапетритис.
ИЗВОР: kurir.mk
