Спортскиот директор на Тотенхем, Фабио Паратичи (50) е суспендиран на две и пол години и во тој период нема да може да врши никаква работа во лондонскиот клуб каде што е главен оперативец.
Паратичи претходно во кариерата беше спортски директор на Јувентус, а против торинскиот клуб беше покренат судски спор поради финансиска измама, што беше причина за заминувањето на Паратичи од клубот.
Јувентус е обвинет дека користел лажен капитал во финансиските книги и плаќал играчи „под маса“ за време на пандемијата.
Поради тоа федералниот суд на Италија ги изрече казните за овој случај. Така Јуве остана без 15 бода, а покрај Паратичи, казнети се и поранешниот претседател на клубот Андреа Ањели, поранешниот директор Маурицио Аривабене, актуелниот спортски директор на Јувентус Федерико Керубини и потпретседателот Павел Недвед.
Паратичи беше на чело на скаутинг службата на Сампдорија од 2004 до 2010 година. Во Јувентус дојде во 2010 година и остана до 2021 година, кога замина во Тотенхем. Неговата играчка кариера траеше од 1989 до 2004 година, а играше за голем број италијански клубови.
ИЗВОР: kurir.mk
