Тик Ток престанува со работа во САД откако социјалната мрежа го загуби спорот со американскиот конгрес.
Според одлуката на Врховниот суд од кинеската компанија се бара апликацијата да биде продадена на американска подружница или во спротивно, ќе биде забранета. Од компанијата потврдуваат дека ако се уште актуеланата администрација не направи некакви измени, Тик Ток, ќе престане да функционира на американско тло. Судбината на ултра популарната апликација сега ќе биде во рацете на новата администрација на Трамп.
„Тик-Ток, за жал, ќе биде принуден да ја прекине работата во САД на 19 јануари, освен ако администрацијата на Џо Бајден не се погрижи да не се спроведе законот со кој се забранува платформата во САД ако неговиот кинески сопственик не се согласи да ја продаде.“ – Тик-Ток.
Тинејџери кои легнуваат на улици и булевари и чекаат да им се приближи возило, струен удар додека се качуваат на вагон да снимаат за Тик Ток. Во изминативе години во Македонија на социјалната мрежа беа споделувани видеа од таканаречени предизвици, кои најчесто ги извршуваат тинејџери, а имуни не се ниту најмладите.
Само во последниот предизвик на Тик Ток наречен Супермен, дваесетина средношколци завршија во градската болница со скршеници. Тешко повредено беше и едно осумгодишно дете .За експертите, децата само го користат она што ние им го даваме и она што им го нуди светот околу нив.
„Вината е во нас, во општеството и во тоа што му се нуди на детето.. Кои содржини децата го гледаат на интернет, што прават, што доживуваат на интернет, ние сме криви. Треба да најдеме начин како да ги заштитиме, прво добро да ги информираме што се може да ги чека на интернет, кои се опасности, како они да го користат интернетот, бидејќи тој има и добри страни, да знаат да препознаваат содржини а во исто време и целото општество е за тоа одговорно и би требало да се најдат начини како да се контролира тоа што оди на интернет на многу повисоко ниво.“ – вели Мирјана Јовановска.
Во многу земји веќе со години се дискутира дека контролата на пристапот до социјалните мрежи за најмладите, не треба да се остави само на нивните родители. Франција, Германија и Белгија, веќе воведоа ограничувања за децата. Од земјите во регионот, Албанија го забрани Тик-Ток на една година. Одлуката следеше по убиството на тинејџер, немил настан кој го покрена прашањето за влијанието на социјалните мрежи врз децата.
Минатата година момче од Босна и Херцеговина се самоуби откако беше објавена негова снимка на Тик-Ток. На видеото детето бара работа на бензинска пумпа, но е понижен и исмеан. Не можејќи да ги поднесе коментарите на социјалните мрежи, детето се самоуби.
Засега најдалеку отиде Австралија која пред неколку месеци, усвои закон со кој на лицата помлади од 16 години им забранува да користат социјални мрежи. Компаниите кои нема ја почитуваат оваа забрана ги чека казна до 32 милиони долари. Мерките првенствено се наменети да го ограничат пристапот до платформите Тик-ток, Фејсбук, Инстаграм и Твитер.
Извор: 24vesti.mk
