Со Законот за слободен пристап до информации од јавен карактер од 2019 година воведен е „тест на штетност“ со кој треба да се утврди дали јавниот интерес да се објави некоја информација натежнува над причините таа да биде скриена од јавноста. Според програмскиот директор во Македонското здружение на млади правници, Гоце Коцевски, ако овој тест се примени во случајот со веќе класифицираниот договор за автопатите со „Бехтел и Енка“, би натежнал јавниот интерес
Гоце Коцевски, програмски директор во Македонското здружение на млади правници, во емисијата „360 степени“ на ТВ Алсат, во која се дебатираше за одлуката на власта за класифицирање на договорот со „Бехтел и Енка“ со степен „доверливо“, вели дека со Законот за слободен пристап до информации од јавен карактер од 2019 година е востоставен „тест на штетност“. Ако во случајов се примени овој тест, рече Коцевски, би натежнал јавниот интерес дека договорот треба да биде јавно објавен.
„Ако се работи за информација која е класифицирана, која е личен податок, која е предмет на кривична или каква било друга постапка што по правило не се смета за информација од јавен карактер, имателот е должен да направи ‘тест на штетност’. Треба да стави на кантар што ќе изгуби државата ако ја објави информацијата, меѓутоа и што ќе добие јавниот интерес ако таа информација се добие. Во самиот закон многу јасно е дефинирано што се смета за јавен интерес. Јавен интерес е доколку откривањето информација овозможува да се разбере прашањето за кое се креира јавна политика или се води парламентарна дебата. Поочигледна основа за јавен интерес од ова навистина нема. Дополнително, ќе се открие противправно стекнување или трошење буџетски средства, потенцијален судир на интереси, загрозување на животната средина. Така што, јавниот интерес натежнува“,
рече Коцевски, цитирајќи го законот.
„360 степени“ пред девет дена, преку барање за слободен пристап до информации од јавен карактер, го побара договорот од Јавното претпријатие за државни патишта.
„Лично, имаме искуство со барање на таков договор пред неколку години, за државна помош за еден несуден инвеститор во зоните, тоа заврши со судски спор, беше со степен на класификација, но тогашната Влада ми одговори со затемнети страници, дури ја немаше ниту одлуката за класификација, но сметам дека барем тоа е информација од јавен карактер за да му докажеш на барателот дека навистина е класифицирано, а не дека некој одлучил арбитрарно да го крие“,
вели новинарот на „360 степени“, Александар Димитриевски, кој беше дел од дебатата во емисијата.
ИЗВОР: 360stepeni.mk
