Најтешко погодена од земјотресот што се случи на 6 февруари во Сирија е северната провинција Алепо каде штетата според Светска банка изнесува 2,3 милијарди долари или 45 отсто од вкупната штета
Над пет милијарди американски долари изнесува штетата што ја претрпе Сирија од силниот земјотрес што минатиот месец ги погоди северните делови на земјата разурната од војна и југоисточна Турција, соопшти денеска Светската банка.
Според Обединетите нации во земјотресот што се случи на 6 февруари загинаа најмалку 50 000 луѓе, од кои околу 6 000 во Сирија, според Обединетите нации. Десетици илјади сè уште се водат како исчезнати, а стотици илјади останаа без покрив над главата.
Во извештајот што го пренесува агенцијата Асошиејтед прес, Светската банка вели дека нивото на штета во Сирија е околу 10 отсто од бруто домашниот производ на земјата.
Сириската северна провинција Алепо беше најтешко погодениот регион, со 45 отсто од вкупната штета во Сирија која изнесува околу 2,3 милијарди долари. Исто така, тешко погоден беше регионот на северозапад, контролиран од бунтовниците, дом на околу 4,6 милиони луѓе, многумина претходно раселени поради војната во Сирија.
По Алепо следуваат северозападната провинција Идлиб, со проценета штета од 1,9 милијарди долари и Латакија, територија под контрола на владата со 549 милиони долари.
Земјотресот донесе и мнoштво други неволји во Сирија, каде во речиси 12-годишната граѓанска војна загинаа речиси половина милион луѓе и предизвика раселување на половина од предвоеното население на земјата од 23 милиони жители.
Светската банка предупреди дека сè уште постои значителен степен на неизвесност околу нејзината прелиминарна проценка.
„Катастрофата ќе предизвика пад на економската активност, што дополнително ќе влијае на изгледите за раст на сириската економија“,
изјави Жан-Кристоф Каре, директор на Светската банка за Блискиот Исток.
Штетата проценета во извештајот опфаќа и станбени и нестанбени сектори, како што се директни штети на згради и објекти, како и штети на објекти од културно наследство, што е особено тешко да се проценат.
Во претходниот извештај Светска банка објави дека штетите во Турција од минатомесечниот земјотрес се проценуваат на 34,2 милијарди американски долари.
Извор: 360stepeni.mk
