ЊУЈОРК (АА) – Американскиот суд во саботата нареди ослободување под надзор на обвинетиот за напад врз „Турска куќа“ (Туркеви) во Њујорк, во САД, претходно оваа недела, јавува Анадолу.
Реџеп Акбијик (29) е обвинет за обид за грабеж, тероризам, поседување оружје за кривично дело, терористички закани, нанесување штета и закани.
Обвиненијата му се прочитани преку преведувач во Кривичниот суд во Њујорк.
Судијата му забрани на Акбијик да се приближи до „Турска куќа“ и нејзината околина.
Следното рочиште ќе се одржи на 25 јули.
Тој беше упатен на Одделот за психијатрија и неврологија во болницата „Белви“ во Њујорк за да биде проценета неговата психичка состојба.
Властите во средата го идентификуваа Акбијик како главен осомничен за нападот рано во понеделникот во кој беше оштетена зградата.
На видеоснимката до која дојде Анадолу се гледа како напаѓачот во 03:14 часот ги крши прозорците на зградата со железна прачка.
Тој беше приведен во петокот.
Турските власти најостро го осудија нападот и ги повикаа локалните власти да го пронајдат напаѓачот и да ја обезбедат потребната заштита за да се осигури безбедноста на нивните дипломатски претставништва.
„Турска куќа“ во Њујорк е импозантна зграда во која се сместени турските дипломатски претставништва од 2021 година, а таму се организираат и културни настани. Се наоѓа веднаш спроти седиштето на Обединетите нации (ОН). Во неа се сместени дипломатски канцеларии, вклучително и турската мисија во ОН и Генералниот конзулат во Њујорк.
