Студентите се незадоволни од, како што велат, континуираната негрижа од страна на МОН и непочитувањето на законските рокови за исплата на средствата за субвенциониран студентски оброк и за стипендија. Незадоволни се и од, според нив, нетранспарентните преговори по однос на новиот закон за студентски оброк и велат оти засега немаат никакви официјални информации како би се одвивала зголемената исплата од, како што велат, „неверојатни 140 денари“ на дневно ниво
Студентите ќе излезат на секојдневни протести и ќе ги блокираат булеварите низ главниот град ако Министерството за образование и наука (МОН) не ги исполни ветувањата кон нив, најави студентското движење Студентски отпор – истото движење кое ги иницира студентските протести за подобрување на студентскиот стандард во ноември минатата година.
Студентите се незадоволни од, како што велат, континуираната негрижа од МОН и непочитувањето на законските рокови за исплата на средствата за субвенциониран студентски оброк и за стипендија.
„Постојано се доцни со исплата на субвенциониран студентски оброк. Според законот, МОН е задолжен на секој први од новиот месец да исплаќа средства (околу 2500 денари) за претходниот месец, а студентите минатата недела ги примија средствата за јануари. Најнова информација од МОН е дека до 15 март сите средства ќе бидат исплатени и сите сметки подмирени. Сакаме да веруваме дека е тоа така, иако согласно досегашното искуство не можеме да бидеме оптимисти и да им веруваме на збор“,
се вели во објавата на студентското движење.
Студентите се незадоволни и од, според нив, нетранспарентните преговори по однос на новиот закон за студентски оброк и додаваат оти засега немаат никакви официјални информации како би се одвивала зголемената исплата од, како што велат, „неверојатни 140 денари“ на дневно ниво.
Додаваат дека МОН доцни и со исплатата на стипендиите – како за оние кои аплицираат по првпат, така и за оние кои ја продолжуваат стипендијата, а незадоволство изразија и поради сè уште незапочнатата реконструкција на студентските домови која МОН ја најави за почетокот на годинава.
„МОН преку својата континуирана негрижа ги принудува студентите повторно со протести и радикализација да си ги бараат своите права“,
порачаа од Студентски отпор.
ИЗВОР: 360stepeni.mk
