Стотици илјади луѓе во Турција и Сирија се останати без работа по катастрофалниот земјотрес

Првите податоци покажуваат дека земјотресите во Турција доведоа до намалување на работната активност и дека околу 658 000 луѓе се без работа или приход, велат од Меѓународната организација на трудот

Над 828 000 работници се останати без работа по серијата земјотреси што во февруари ги погодија југоисточна Турција и северна Сирија, објави Меѓународната организација на трудот.

Првите податоци покажуваат дека земјотресите во Турција доведоа до намалување на работната активност и дека околу 658 000 луѓе се без работа или приход, според проценката на таа агенција на ОН.

Во Сирија, каде веќе 12 години трае граѓанска војна која нанесе големи штети на економијата и на пазарот на трудот, околу 170 000 работници останаа без работа поради земјотресот.

„Без итна и насочена помош, со сиромаштијата, неформалното вработување и детскиот труд бројот веројатно ќе се зголеми“,

предупреди организацијата, додавајќи дека отворањето работни места е од суштинско значење за „ефективен и инклузивен одговор“ на катастрофата.

Меѓународните донатори на конференцијата во Брисел минатата недела ветија дека ќе обезбедат седум милијарди евра помош за населението на Турција и Сирија погодени од земјотресот на 6 февруари во кој загинаа повеќе од 56 000 луѓе и предизвика штета која се проценува на повеќе од 100 милијарди евра.