Сојузот на синдикатите на Македонија (ССМ) најави дека ќе го надгледува спроведувањето на новогодишната кошничка, која од 15 декември до 15 јануари ќе овозможи намалување на цените на над 600 производи.
ССМ посочува дека синдикалната минимална кошничка ќе биде клучен показател за ефектот од мерката.
„Новата синдикална минимална кошничка ќе биде пресметана на 20 декември, што ќе покаже дали цените на основните прехранбени производи навистина се намалени. Дополнително, на 20 јануари ќе утврдиме дали по завршувањето на акцијата, трговците ги зголемиле цените, со што би се изгубил ефектот од мерката,“ велат од ССМ.
Тие предупредуваат дека претходно, за време на слични мерки, некои трговци ги намалиле платите на своите вработени и ја зголемиле цената на производите, што го нарушило ефектот од акциите.
ССМ апелира до стопанствениците да покажат општествена одговорност. Во спротивно, тие бараат воведување строги казни за оние што ќе се обидат да го изиграат системот.
„Мерките кои се носат во интерес на работниците и граѓаните, особено на оние со најниски примања, ги поздравуваме,“ се наведува во соопштението.
Граѓаните ќе можат да се информираат за производите вклучени во акцијата преку веб-страницата „mojakosnica.mk“. На листата се наоѓаат над 675 производи од 60 компании и дистрибутери.
Новогодишната кошничка, со која се очекува намалување на цените за најмалку 10%, ќе трае еден месец. ССМ изразува надеж дека оваа акција ќе придонесе за финансиско олеснување на граѓаните во текот на празниците.
ИЗВОР: racin.mk
