Изјавата на министерот Милош Вучевиќ следува откако новинската агенција Ројтерс, повикувајќи се на протечените документи на Пентагон, објави дека Србија се согласила да испорача оружје во Киев или веќе го испорачала
Српскиот министер за одбрана Милош Вучевиќ изјави дека Србија ниту продавала, ниту ќе продава оружје на украинската или руската страна, ниту, пак, на земјите кои на некој начин се вклучени во овој конфликт.
Изјавата на Вучевиќ следува откако новинската агенција Ројтерс, повикувајќи се на протечените документи на Пентагон, објави дека Србија се согласила да испорача оружје во Киев или веќе го испорачала.
„Нечија цел е очигледно да ја дестабилизира нашата земја и да ја вовлече во конфликт во кој нема да учествуваме. Ние постојано се држиме до нашата воспоставена политика“,
рече српскиот министер за одбрана Милош Вучевиќ.
Вучевиќ додаде дека по којзнае кој пат е објавена лагата оти Србија ѝ продава оружје на Украина.
„Ние ги негиравме тие невистини повеќе од десет пати, и еве нè, ќе го повториме тоа. Србија нема, ниту ќе продава оружје на украинската или руската страна, ниту на земјите што го опкружуваат тој конфликт. Сè што е објавено на таа тема се невистинити шпекулации“,
рече Вучевиќ.
Протечениот документ на Пентагон со наслов „Европа – Одговор на тековниот руско-украински конфликт“, како што објави Ројтерс, е во форма на графикон во кој се резимирани позициите на 38 европски влади и нивниот одговор во врска со барањата на Украина за воена помош.
„Табелата покажа дека Србија одбила да обезбеди обука за украинските сили, но ветила дека ќе испрати воена помош или веќе ја доставила. Исто така, се вели дека Србија има политичка волја и воена способност во иднина да ѝ обезбедува оружје на Украина“,
објави Ројтерс.
Новинската агенција додаде дека документот ја носи ознаката „доверливо“ и НОФОРН – ознака со која се забранува негова дистрибуција на странски разузнавачки служби и војски.
