Три лица се уапсени, а српските власти ги сомничат дека повикувале граѓаните да се соберат и да ги срушат претседателот Вучиќ и Владата на Србија
Српското Министерство за внатрешни работи (МВР) потврди дека уапсило вкупно три лица поврзани со синоќешните протести на десничарите против француско-германскиот предлог за решавање на прашањето со Косово.
Полицијата објави и видео од приведувањето на две лица кои се меѓу организаторите и говорниците на протестот, како и едно лице кое беше уапсено со карабин.
Од видеото се гледа како полицајците ги соборуваат на земја, ги претресуваат и приведуваат.
Тројцата се товарат дека ги повикувале граѓаните да се соберат во што поголем број во Белград и насилно да ги срушат претседателот Александар Вучиќ и српската влада.
Синоќешниот протест на српските десничари започна со собир кај споменикот на рускиот цар Николај во Белград, потоа продолжи пред зградата на Претседателството на Србија, а заврши пред полициска станица каде што демонстрантите тврдеа дека се наоѓаат приведени граѓани. Беа забележани и неколку инциденти како рушење на оградата пред Претседателството и обид за насилен влез во полициската станица.
Демонстрантите бараа Вучиќ или да си поднесе оставка или да ја промени политиката кон Косово, а со себе носеа и руски знамиња, како и транспаренти со проруски пораки.
ПОВРЗАНИ ВЕСТИ:
Демонстранти ја срушија оградата пред Претседателството на Србија: „Каде е Вучиќ“, „Предавство“
Извор: 360stepeni.mk
