ИСТАНБУЛ (АА) – Разговорите во ограничен формат на економската група БРИКС започнаа денес на вториот ден од самитот на Блокот во рускиот град Казан, јавува Анадолу.
Состанокот со кој претседава рускиот претседател Владимир Путин започна со обраќање до лидерите на земјите на БРИКС, меѓу кои и оние на Египет, Етиопија, Иран и Обединетите Арапски Емирати, кои учествуваат на самитот на блокот за прв пат откако станаа официјални членки во јануари.
Меѓу членките на Блокот, само Бразил е претставен на ниво на министер за надворешни работи, бидејќи претседателот Луис Инасио Лула да Силва не може да патува поради повреда, а учествува преку видеоконференција.
Како што соопшти Кремљ, агендата на состанокот вклучува размена на мислења и за глобалните и за регионалните прашања.
Во соопштението, исто така, се наведува дека на состанокот ќе се разговара и за трите главни области на соработка наведени од руското претседавање со групата: политика и безбедност, економија и финансии и културни и хуманитарни контакти.
„Особено внимание ќе се посвети на прашањето за можно проширување на БРИКС преку планирано формирање на нова категорија ‘држави-партнери’“, се додава.
Турскиот претседател Реџеп Таип Ердоган ќе пристигне подоцна во текот на денот како гостин и треба да присуствува на состанокот на самитот во проширен формат, а ќе оствари и средба со Путин на маргините на самитот.
На тридневниот самит присуствуваат долгогодишните членки Бразил, Русија, Индија, Кина и Јужноафриканската Република – изворот на името на групата – како и од неодамна новите земји членки Египет, Етиопија, Иран и ОАЕ.
Извор: Anadolu Agency (AA)
