Уште пред да биде официјално прогласен за победник во претседателската трка, Доналд Трамп прославуваше за победата на неговиот имот Мар-а-лаго на Флорида.
Во резиденцијата на Доналд Трамп, пред официјалното соопштување на резултатите, на забавата на изборната ноќ присуствувале јавни личности, меѓу кои и мултимилијардерот Илон Маск, кој на мрежата Икс напиша „Гем, сет меч“ или фразата за победа во тениски меч.
Под еуфориија следеа и објави: „Америка е нација на градители. Наскоро ќе бидете слободни да градите. Иднината ќе биде фантастична“. Најбогатиот човек во светот, на социјалните мрежи повторно „го прошета мијалникот“, односно фото монтажа, на која држи мијалник во Белата куќа. Сликата беше потсетување на шегата која тој ја сподели кога ја купи социјалната мрежа „Твитер“, како влегува во седиштето на „Твитер“ со мијалник.
Маск го поддржуваше републиканскиот кандидат Доналд Трамп и беше активно вклучен во неговата кампања. Мултимилијадерот, донираше над 130 милиони долари за кампањата на Трамп. Маск изјави дека ќе остане активен во политиката и по изборите. Во разговор, емитуван во живо на платформата „Икс“, Маск нагласи дека неговиот про-Трампов Комитет, ќе продолжи со активности и по изборите и истиот ќе се подготвува за следните меѓуизбори и ќе се вклучува во локални трки, како и избори за државни обвинители низ целата земја.
Републиканецот претходно изјави дека сопственикот на „СпејсИкс“, Илон Маск, ќе зазеде важна позиција во новата администрација, а поврзано со реформирање на Владата и драстично кратење на федералните трошоци.
Судот во Пенсилванија пак претходно ја прогласи за дозволена контроверзната лотарија од 1 милион долари дневно, на Илон Маск. Лотаријата била од симболично значење, дневната награда од милион долари на едно лице заврши со самиот крај на изборите. Претходно Маск најави дека до изборите ќе додели по еден милион долари дневно на регистриран гласач во „свинг“ американските држави.
Извор: 24vesti.mk
