Претседателката на албанскиот парламент Елиса Спиропали денеска изрази сочувство за трагедијата во Кочани, наведувајќи дека таа „ е со семејствата кои ги загубија своите најблиски“.
„Тажна вест за страшната трагедија во Кочани, С.Македонија, каде животот го загубија десетици девојчиња и момчиња. Во оваа тажна недела јас сум со семејствата кои ги загубија своите најблиски. На повредените им посакувам брзо закрепнување. Сила и храброст за народот и властите на Северна Македонија во соочувањето со оваа голема трагедија“, пишува во пораката со сочувство.
До својот македонски колега Владо Мисајловски, телеграма со сочувство упати министерот за одбрана, Пиро Венгу, во која му го пренесува своето сочувство и солидарност со погодените во трагедијата.
„Длабоко ме допре трагедијата што ја погоди нашата пријателска земја. На мојот колега му изразив сочувство и солидарност со семејствата на жртвите и со целиот македонски народ во овој тежок момент. Албанија стои до нашите соседи и е подготвена да обезбеди секаква неопходна помош, напиша Венгу на социјалните мрежи.
Сочувство, од затворски притвор каде се наоѓа, изрази и лидерот на Партијата на слободата Илир Мета, кој наведува дека „со длабока тага и шок ја примил веста за големата трагедија во Кочани“.
„На овој тежок ден, јас и Партијата на слободата изразуваме најдлабоко сочувство до семејствата на жртвите за големите и незаменливи загуби и се молиме за брзо закрепнување на преживеаните. Ја пренесувам нашата целосна солидарност до премиерот Христијан Мицкоски, властите и граѓаните на соседна и пријателска Северна Македонија и стоиме покрај нив во овие болни моменти“, напиша Мета.
И претседателот на Демократската партија и поранешен премиер, Сали Бериша изрази сочувство за трагедијата во Кочани, додавајќи дека се молат за побрзо закрепнување на повредените.
-Голема трагедија во Северна Македонија, која не потресе сите. Во оваа прилика, им изразувам најдлабоко сочувство од име Демократската партија до семејствата на жртвите, како и нашата солидарност со локалните и централните власти на Северна Македонија. Се молиме за брзо и целосно закрепнување на повредените во оваа страшна трагедија, напиша Бериша во објава на социјалните мрежи.
Во албанските медиуми, трагедијата во Кочани, денеска е главна тема и се пренесуваат сите детали поврзани со неа.
ИЗВОР: kurir.mk
