Ја поддржуваме Украина од првиот ден на инвазијата и ќе продолжиме да ја поддржуваме непоколебливо. Мораме и да продолжиме да вршиме притисок врз Русија, вели претседателката на Европската комисија
Победа на Украина, која беше нападната од Русија, е егзистенцијално прашање за Европа и нема поголем приоритет за ЕУ од тоа, изјави Улф Кристерсон, премиер на Шведска, која го презеде претседавањето со ЕУ на 1 јануари.
„Победата на Украина има егзистенцијално значење за Европа, нема повисок приоритет од Украина. Судбината на Украина е и судбина на Европа“,
рече Кристерсон на заедничката прес-конференција со претседателката на Европската комисија Урсула фон дер Лајен.
Вчера и денеска шведската влада беше домаќин на членовите на ЕК во Кируна, најсеверниот град во Шведска. На средбата се разговарало за приоритетите за следните шест месеци. Претседателката на ЕК посочи дека ЕУ треба да го зголеми притисокот врз Русија и да продолжи да и помага на Украина.
„Ја поддржуваме Украина од првиот ден на инвазијата и ќе продолжиме да ја поддржуваме непоколебливо. Мораме и да продолжиме да вршиме притисок врз Русија“,
рече Фон дер Лајен.
Таа најави дека ЕК напролет ќе објави предлог за реформа на пазарот на електрична енергија и дека ќе изработи механизам за заедничка набавка на гас.
Кристерсон, Фон дер Лајен и шведскиот крал Карл XVI учествуваа на свеченото отворање на првата станица за лансирање сателити на европскиот континент во Кируна. Претседателката на ЕК рече дека малите сателити кои ќе бидат испратени во вселената од северот на Шведска ќе бидат важни за следење на последиците од климатските промени, природните катастрофи и елиминирање на нивните последици, како и за безбедноста, што е евидентно, меѓу други работи, по војната во Украина.
Извор: 360stepeni.mk
