Швајцарија ја совлада Словенија со 2-1 и стигна до три победи во Лигата на нации, но триумфот на домашен терен донесе и сериозна главоболка пред следниот натпревар. Теренот во Луцерн, според информациите е во очајна состојба, а уште поголем проблем е што на истиот стадион веќе во вторник ќе гостува Македонија.
Иако швајцарските репрезентативци не сакаа да бараат оправдување во условите за игра, јасно беше дека лошата подлога сериозно влијаеше врз нивната игра.
„Не беше воопшто лесно. Со нашиот стил на фудбал, на ваков терен нормално е да се случат една или две грешки. Но, на крајот мора да се навикнете, бидејќи и противникот игра на истиот терен“, изјави Ардон Јашари.
Сличен став имаше и Јохан Манзамби, кој нагласи дека професионалните фудбалери мора да бидат подготвени да играат во различни услови.
„Секако дека е тешко. Но, ние сме професионалци и знаеме дека терените не се секогаш идеални. Тоа не може да биде оправдување“, порача Манзамби.
Сепак, реалноста на теренот беше поинаква. Иако стадионот во Луцерн речиси две недели немаше натпревари или тренинзи, подлогата за само 90 минути се претвори во раскопано игралиште. При речиси секој дуел, промена на правец или подолго додавање, се одвојуваа парчиња трева.
Тоа беше особено проблематично за Швајцарија, која се обидува да ја контролира играта со посед и кратки додавања против екипи кои се повлекуваат длабоко. Селекторот Мурат Јакин претпоставува дека така ќе игра и Македонија. Интересно е дека Швајцарците се жалеа и на тревникот на Националната Арена „Тодор Проески“, но потоа лесно победија во Скопје.
Градот Луцерн, во соработка со приватна компанија, во изминатиот период работел на подобрување на тревникот, а на одредени делови дури била поставена и нова трева. Но, новите делови немале доволно време да се поврзат и стабилизираат со подлогата.
Особено загрижува фактот што Швајцарската фудбалска федерација има свој специјалист за терени, Пјер-Ив Бовини, кој секогаш пристигнува на стадионот околу два месеци пред репрезентативниот натпревар.
Тој со луѓето задолжени за одржување на теренот изработува план за подготовка, а состојбата на тревникот се следи и пријавува неколкупати неделно.
Сега, сепак, времето е најголемиот проблем. По натпреварот со Словенија, Швајцарија има само два дена за да го подготви теренот за Македонија.
Тоа значи дека тревникот во Луцерн ќе мора експресно да се доведе во подобра состојба, иако по само еден натпревар веќе беше сериозно оштетен.
За Македонија, пак, ваквите услови можат да бидат значаен фактор во натпреварот, особено ако теренот повторно не биде на потребното ниво. Во секој случај, нашиот национален тим вечерва ќе одржи официјален тренинг на стадионот во Луцерн и ќе се запознае со условите за игра на утрешниот меч.
Извор: sportmanija.mk
