Штрајкот на персоналот на германските аеродроми погодува стотици илјади патници

Според здружението „АДВ ерпортс“ (ADV Airports), околу 295 000 патници биле погодени од откажувањето на 2 340 лета на аеродромите во Бремен, Дортмунд, Франкфурт, Хамбург, Хановер, Минхен и Штутгарт

Седум германски аеродроми денеска одржуваат 24-часовен штрајк, кој може да погоди речиси 300 000 патници, бидејќи членовите на синдикатот бараат зголемување на платите.

„Терминалите се празни утрово“,

изјави портпаролот на аеродромот во Хамбург додавајќи дека се појавиле само мал број од 32 000 очекувани патници, пренесува Хина повикувајќи се на Ројтерс.

Според здружението „АДВ ерпортс“ (ADV Airports), околу 295 000 патници биле погодени од откажувањето на 2 340 лета на аеродромите во Бремен, Дортмунд, Франкфурт, Хамбург, Хановер, Минхен и Штутгарт.

„Кога ги видовме терминалите на аеродромот утрово, тие повеќе нè потсетија на најлошите денови од пандемијата на коронавирусот отколку на предупредувачки штрајк“,

рече Ралф Бејзел од АДВ за телевизија Бајеришер рандфунк.

Германскиот синдикат „Верди“ го најави штрајкот во средата, појаснувајќи дека преговорите за колективен договор за копнениот персонал, вработените во јавниот сектор и работниците за воздушна безбедност постигнале мал напредок.

„Ако ништо не се преземе во врска со платите сега, сите нас нè чека уште едно хаотично лето. Ова е можност да се испрати силен сигнал“,

изјави заменик-претседателката на „Верди“, Кристин Беле, за Инфорадио.

Штрајкот се совпаѓа со 59. Минхенска безбедносна конференција (МСЦ).

Романскиот министер за надворешни работи, кој требаше да пристигне со еден од откажаните летови, ќе слета на австриски аеродром наместо во Минхен, а потоа ќе вози повеќе од четири часа до Минхен за да дојде до конференцијата, изјави претставник на романската амбасада во Берлин.