Не е точно дека ЕУ не ја сака Македонија, ниту пак дека земјата не е способна да биде дел од Унијата. Ваква порака испрати евроамбасадорот во земјава, Дејвид Гир. На неколку дена од стартот на изборната кампања, на денот кога се одбележува 4тата годишнина од членството во НАТО, Гир порача дека патот на земјата кон ЕУ е практичен и се заснова на обврските кои Македонија ги презеде со преговарачката рамка во јули 2022 година.
Потсети на првата политичка меѓувладина конференција, на скрининг процесот, но и на имплементација на реформите кои се вклучени и во Планот за раст.
– Вообичаено е да се слушнат гласови на сирени кои велат дека оваа земја не може да и пристапи на Унијата, или затоа што, таа не ја сака внатре или затоа што не е способна да биде дел од ЕУ. Ниту едно од овие тврдења не е точно. Ние сакаме Северна Македонија да биде дел од Европската унија, патот е практичен и многу лесно остварлив, вели евроамбасадорот Дејвид Гир.
А германскиот канцелар Олаф Шолц, за време на официјалната посета на Словенија, кажа дека процесот на приближување на Западен Балкан кон ЕУ доби замав. Порача дека се туркаат многу прашања, а ја спомна и Македонија.
– Добро е што се појави нова динамика и што туркаме многу конкретни прашања. Тоа се однесува на решавање на билатералните конфликти кои се пречка, како што е прашањето: Како сега да го придвижиме процесот со Северна Македонија, а да не биде попречен меѓу државите членки? Ова се однесува на прашањето за Србија/Косово, а секако и за прашањето: Што понатаму со Босна и Херцеговина, вели Олаф Шолц.
Германскиот Бундестаг во знак на поддршка земјата кон ЕУ, минатата година, усвои резолуција за поддршка на македонскиот јазик и идентитет. Специјалниот претставник на Германија за Западен Балкан, Мануел Сарацин за ТВ24,тогаш кажа , земјата да не се надева на нова преговарачка рамка. Македонија во јули 2022 година ја стартуваше првата политичка меѓувладина конференција, но за да ги продолжи преговорите, треба да ги вметне Бугарите во Уставот.
Извор: 24vesti.mk
