Остин, кој е највисокиот функционер во администрацијата на актуелниот американски претседател Џо Бајден што го посетил Ирак, беше последниот командант на американските сили во земјата по инвазијата
Американскиот министер за одбрана Лојд Остин денеска пристигна во ненајавена посета на Ирак со цел да покаже дека Соединетите Држави сè уште имаат намера да го одржат военото присуство во земјата, речиси 20 години откако го соборија Садам Хусеин, јавуваат светските агенции.
Остин, кој е највисокиот функционер во администрацијата на актуелниот американски претседател Џо Бајден што го посетил Ирак, беше последниот командант на американските сили во земјата по инвазијата.
„Тука сум за да го потврдам стратегиското партнерство меѓу Соединетите Држави и Ирак додека се движиме кон побезбеден, стабилен и суверен Ирак“,
рече Остин.
САД во моментов имаат 2 500 војници во Ирак и дополнителни 900 во Сирија како поддршка на локалните трупи во борбата против „Исламска држава“, која зазеде делови од територијата во двете земји во 2014 година.
„Она што (Ирачаните) ќе го слушнат од него е посветеноста на одржување на присуството на нашите сили, но не станува збор само за воениот инструмент. САД се многу заинтересирани за стратегиско партнерство со владата на Ирак“,
изјавил во врска со посетата на Остоин висок американски претставник на одбраната кој сакал да остане анонимен.
За време на посетата на Ирак, американскиот министер за одбрана ќе се сретне со премиерот на Ирак, Мохамед Шиа Ал Судани, како и со претседателот на регионот Ирачки Курдистан, Нечирван Барзани. Инаку, ирачката национална влада и регионалната курдска влада водат долготраен спор околу буџетските трансфери и поделбата на приходите од продажбата на нафта.
Инвазијата на Ирак од страна на САД се случи во 2003 година за време на мандатот на поранешниот претседател Џорџ В. Буш, а оправдувањето за неа беше дека земјата поседува оружје за масовно уништување, што подоцна се покажа како неточно, бидејќи такви резерви не беа откриени од американските и сојузничките сили.
Според проектот „Кост од вар“ (Cost of War) на Институтот за меѓународни студии на Универзитетот Браун во војната животите ги загубија помеѓу 185 000 и 208 000 ирачки цивили.
Остин, тогаш во својство на шеф на сите американски сили на Блискиот Исток, во 2011 година изјави дека САД ги постигнале своите воени цели во Ирак.
Сепак, за време администрацијата на поранешниот претседател Барак Обама, САД три години подоцна испратија илјадници војници назад во Ирак и Сирија за да ја засилат борбата против „Исламска држава“.
Пензионираниот генерал на американскиот марински корпус Френк Мекензи, кој до минатата година ги предводеше американските сили на Блискиот Исток, рече дека патувањето на Остин ја покажува посветеноста на Вашингтон кон земјата по, како што рече, претходните грешки.
Извор: 360stepeni.mk
