Kоментарите на Јенс Столтенберг уследија откако руската паравоената група „Вагнер“ која го предводи нападот на Бахмут, објави дека го освоила источниот брег на градот уништен во најдолгата битка од руската инвазија на Украина
Генералниот секретар на НАТО, Јенс Столтенберг, предупреди дека по неколкумесечните интензивни борби, градот Бахмут во источна Украина би можел да падне во рацете на Русија во наредните денови.
Неговите коментари уследија откако руската паравоената група „Вагнер“ која го предводи нападот на Бахмут, објави дека го освоила источниот брег на градот уништен во најдолгата битка од руската инвазија на Украина.
Шефот на „Вагнер“ и сојузник на Кремљ, Евгениј Пригожин, денеска објави дека неговите сили го зазеле целиот источен дел на Бахмут.
Интензивните борби околу Бахмут се најдолгите и најкрвавите во руската инвазија која трае повеќе од една година
„Она што го гледаме е дека Русија користи повеќе војници, повеќе сили, а она што ѝ недостасува во квалитет се обидува да го надополни во квантитет, но не можеме да исклучиме дека Бахмут би можел да падне во наредните денови“,
изјави Столтенберг додавајќи дека тоа не мора да одразува каква било пресвртница во војната.
Украинскиот претседател Володимир Зеленски во интервју за Си-ен-ен кажа дека неговите вооружени сили се решени да останат во Бахмут, но предупреди што може да се случи доколку градот падне во рацете на Русија.
„Јасно ни е дека по Бахмут, руските сили би можеле да одат понатаму и да ги нападнат околните градови во регионот на Донецк. Би можеле да одат во Краматорск, би можеле да одат во Славјанск. По Бахмут, тоа ќе им го отвори патот на Русите кон другите градови во Украина, во правец на Донецк“,
рече Зеленски.
Извор: 360stepeni.mk
