Северна Кореја тврди дека ја тестирала најмоќната ракета досега

Севернокорејскиот лидер Ким Џонг Ун наводно изјавил дека ова тестирање ќе ги натера ривалите „да страдаат од екстремен страв и вознемиреност“

Северна Кореја соопшти дека тестирала нова интерконтинентална балистичка ракета која работи со цврсто гориво и оти тоа е нејзината најмоќна ракета досега, а лансирањето беше поздравено од државните медиуми.

Станува збор за тестирањето кое се случи вчера, а предизвика тревога во Јапонија каде беше издадена и наредба на евакуација, но беше повлечена по половина час.

Севернокорејскиот лидер Ким Џонг Ун го надгледуваше лансирањето во друштво на неговите ќерка, сопруга и сестра и наводно, како што пренесуваат медиуми, изјавил дека ова тестирање ќе ги натера ривалите „да страдаат од екстремен страв и вознемиреност“.

Ракетите со цврсто гориво се разликуваат од тие со течно, по тоа што може да бидат истрелани многу побрзо и тоа го отежнува нивното пресретнување.

Јапонија, Јужна Кореја и САД, пак, остро го осудија лансирањето. Министерството за одбрана на Јужна Кореја денеска излезе со оценка дека технологијата која била користена за ракетата не е нова и тестирањето го опиша само како „среден чекор“ во развојот на целосен ракетен систем со цврсто гориво.