Сега и Кина тврди дека американски балони го прелетувале нејзиниот воздушен простор

„Од минатата година американските балони на голема височина извршија повеќе од 10 нелегални лета во кинескиот воздушен простор без одобрение од релевантни кинески институции“, рекол портпаролот на кинеското Министерство за надворешни работи Ванг Венбин, кој конкретно не ги опишал балоните како воени или шпионски

Дипломатскиот спор меѓу Кина и САД во врска со шпионските балони се продлабочува откако Кина денеска соопшти дека американски балони го прелетале нејзиниот воздушен простор на голема височина без дозвола повеќе од 10 пати од почетокот на 2022 година.

Вашингтон синоќа соопшти дека американски борбен авион Ф-16 вчера го соборил третиот по ред неидентификуван летечки објект што се појавува во северноамериканскиот воздушен простор изминатава недела. Објектот бил соборен во близина на езерото Хјурон.

„Од минатата година американските балони на голема височина извршија повеќе од 10 нелегални летови во кинескиот воздушен простор без одобрение од релевантни кинески институции“,

рекол портпаролот на кинеското Министерство за надворешни работи Ванг Венбин на редовниот брифинг во Пекинг денеска, пренесува Ројтерс.

Според новинската агенција, Ванг конкретно не ги опишал балоните како воени или шпионски и не дал дополнителни детали.

На прашањето како Кина реагирала на таквите упади во нејзиниот воздушен простор, Ванг рече дека нејзините одговори биле „одговорни и професионални“.

Од Министерството за одбрана на САД засега нема одговор на барањето за коментар од Ројтерс во врска со наводите на Пекинг.

Тврдењето на Кина доаѓа откако Соединетите Американски Држави на 4 февруари соборија, како што рекоа, кинески шпионски балон во близина на брегот на Јужна Каролина кој со денови лебдеше над континенталниот дел на САД.

Поради балоните, САД ја одложија посетата на државниот секретар Ентони Блинкен на Пекинг, која беше планирана за 3 февруари и требаше да биде прв состанок на високо ниво меѓу САД и Кина во последните неколку години.

Кина вели дека балонот бил цивилен и по грешка залутал во воздушниот простор на САД, истовремено обвинувајќи го Вашингтон за неумерена и претерана реакција.

 „Првата работа што треба да ја направи американската страна е да се погледне себеси, да ги промени своите начини, да не оцрнува и да поттикнува конфронтација“,

рече Ванг.

Во последните денови американската војска собори уште три летечки објекти над Северна Америка.

Ванг рече дека нема информации за последните три објекти соборени од САД.