АНКАРА (АА) – Американската војска синоќа собори неидентификуван беспилотен објект кој леташе над регионот на Големите Езера во сојузната држава Мичиген, пренесува Анадолу.
„Ф-16 истрела AIM9x (проектил) за да собори објект кој леташе на приближно 20.000 стапки надморска височина во воздушниот простор на САД над езерото Хјурон, во државата Мичиген“, се вели во соопштението на Пентагон.
Се истакнува дека Северноамериканската воздушна одбранбена команда (НОРАД) го открила објектот вчера утрото и визуелно и радарски го следела.
„Врз основа на патеката на летот и податоците, можевме да го поврземе овој објект со радарски сигнал фатен над Монтана, кој леташе во близина на чувствителни локации на ДОД (Одделот за одбрана)“, се наведува во соопштението.
Пентагон „не оцени дека тоа е кинетичка воена закана за ништо на земјата, но оцени дека е опасност за летовите и закана поради неговите потенцијални извидувачки можности.“
Се истакнува дека тим прави напори за да дознае повеќе за објектот.
„Американската војска неутрализира уште еден објект над езерото Хјурон“, објави претходно на Твитер сенаторот од Мичиген, Џек Бергман.
Пензионираниот генерал-полковник рече дека бил во контакт со Министерството за одбрана „во врска со операциите во регионот на Големите езера.“
Во саботата, канадскиот премиер Џастин Трудо нареди борбен авион да собори неидентификуван објект во воздушниот простор на Канада.
Последниот инцидент е четврти по ред на соборување објекти во северноамериканскиот воздушен простор во последните осум дена.
Пред една недела, САД соборија кинески разузнавачки балон, а потоа претседателот Џо Бајден санкционира шест кинески субјекти, дел од воздухопловната индустрија на Пекинг.
САД соборија уште еден објект во петокот во близина на брегот на сојузната држава Алјаска. Беше опишан дека е со големина на мал автомобил, но не беа откриени дополнителни детали.
Извор: www.aa.com.tr
