ВАШИНГТОН (АА) – Смртноста на децата и тинејџерите во САД предизвикана од оружје се зголеми за 50 отсто во последните две години, се наведува во анализата на Истражувачкиот центар „Пју“ објавена оваа недела, пренесува Анадолу.
Пред избувнувањето на пандемијата на коронавирус во 2019 година, бројката на смртни случаи поврзани со огнено оружје меѓу американските деца и адолесцентите помлади од 18 години изнесуваше 1.732.
Меѓутоа, до 2021 година, оваа бројка значително се зголеми на 2.590.
„Стапката на смртност од оружје меѓу децата и тинејџерите се зголеми од 2,4 смртни случаи на 100.000 малолетни жители во 2019 на 3,5 такви случаи две години подоцна, што е зголемување од 46 %“, се наведува во анализата.
Истражувачкиот центар „Пју“ изврши анализа по кобната пукотница во училиште на 27 март во Нешвил, Тенеси, во која се убиени 6 лица, од кои 3 деца.
„Стапката на убиени деца во пукотници во 2021 година беше најголема од 1999 година“, објави Центарот.
Центарот за потребите на анализата ја користел најновата статистика за смртноста што ја објави Центарот за контрола и превенција на болести.
Извор: www.aa.com.tr
