Според информациите, станува збор триесет и шестгодишниот мајор Михаил Жилин, припадник на руската Федерална служба за заштита. Тој, минатата година кога рускиот претседател Владимир Путин ја објави одлуката за делумна мобилизација, побегнал во Казахстан илегално минувајќи ја границата преку шумски појас. Неговата сопруга и децата со возило влегле во соседната земја преку контролен пункт
Офицер на руската Федерална служба за безбедност, кој побегнал од земјата бидејќи бил против инвазијата на Украина, е осуден на шест и пол години затворска казна, пишува Ројтерс повикувајќи се на информативната интернет-страница „Тајга инфо“ со седиште во Новосибирск.
Според информациите, станува збор триесет и шестгодишниот мајор Михаил Жилин, припадник на руската Федерална служба за заштита. Тој, минатата година кога рускиот претседател Владимир Путин ја објави одлуката за делумна мобилизација, побегнал во Казахстан илегално минувајќи ја границата преку шумски појас. Неговата сопруга и децата со возило влегле во соседната земја преку контролен пункт.
Жилин барал статус на бегалец во поранешната советска република, но неговото барање било одбиено од казахстанските власти и му било оневозможено да замине за Ерменија.
Кон крајот на минатата година тој им бил предаден на руските власти, а според последните информации е и осуден, што, како што се наведува, е редок случај офицер да биде осуден за дезертерство.
Делумната мобилизација беше објавена од рускиот претседател Владимир Путин на 21 септември минатата година. Со неа беа опфатени 300 000 резервисти, кои им беа потребни на руските сили по серијата воени порази во областа Харков во источна Украина и зголемениот притисок врз нивните сили во јужниот регион Херсон.
Мобилизацијата заврши на 28 октомври, а во меѓувреме голем број руски граѓани ја напуштија земјата бегајќи најчесто во соседните земји, а низ Русија се одржаа и протести против ваквата одлука.
Извор: 360stepeni.mk
