МОСКВА (АА) – Долниот дом на рускиот Парламент, Државнаta дума, гласаше да подготви жалба до Советот за безбедност на ОН, со барање за истрага за експлозиите на гасоводите „Северен тек“ во Балтичкото Море, јавува Анадолу.
На пленарна седница во Москва, претседателот на Државната дума, Вјачслав Володин, им наложи на пратениците да ги проценат загубите што ги претрпеле рускиот енергетски систем, компанијата „Гаспром“ и животната средина како резултат на овие експлозии.
„Апелот до ОН е вистинскиот чекор, но мораме да побараме и од државите кои се поврзани со ова… Ајде да пресметаме каква штета претрпе нашата компанија „Гаспром“. Каква штета претрпе животната средина, каква штета е направена? Дали европските земји ќе му го простат сево ова на [американскиот претседател Џо] Бајден, тоа нека си го решат меѓу себе. Ние нема да го сториме тоа“, рече Володин.
„Многу пари од странски држави се распределуваат на банкарските сметки во Русија“, рече тој, предупредувајќи дека доколку руските средства се експропираат во странство, странските пари може да се користат за компензација.
Експлозиите се случија на 26 септември минатата година, предизвикувајќи големи пукнатини и истекување на гас од двата цевководи што се движат од Русија до Германија под Балтичкото Море. Официјални лица од земјите во регионот рекоа дека саботажа била најверојатната причина за инцидентот.
На 8 февруари, американскиот истражувачки новинар и добитник на Пулицерова награда, Сејмур Херш, ги објави резултатите од сопствената истрага за експлозиите, тврдејќи дека нуркачите на американската морнарица, со поддршка на норвешки специјалци, поставиле експлозивни направи под руските гасоводи во јуни 2022 година, под покровителство на воените вежби „Балтопс“.
Според Херш, одлуката за операцијата ја донел американскиот претседател Бајден по деветмесечни разговори со претставници на администрацијата, одговорни за прашањата за националната безбедност.
Извор: www.aa.com.tr
