МОСКВА (АА) – Русија започна воени вежби со интерконтиненталната балистичка ракета „Јарс“, соопшти денес руското Министерство за одбрана, пренесува Анадолу.
Во инспекцијата и вежбите, кои се одржуваат во три сибирски региони, меѓу кои и во Омск и Новосибирск, вклучени се над 3.000 војници и 300 единици воена опрема, додава Министерството.
„Посебна комисија на Стратегиските ракетни сили ја испитува координацијата на акциите на војската при извршувањето на зададените задачи“, се истакнува.
Воените вежби се одржуваат во согласност со планот за обука на Министерството за 2023 година и се насочени кон обука за маневрирање.
„Исто така, Стратегиските ракетни сили ќе спроведат сет активности за маскирање и спротивставување на современите средства за воздушно извидување во соработка со формациите и единиците на Централниот воен округ и Воздухопловните сили“, соопшти Министерството.
Посебно внимание ќе ѝ се посвети на употребата на дронови со различни модификации, се вели оттаму.
Руското Министерство, исто така, соопшти и дека по вежбите ќе одлучи за општото ниво на борбена обука на единиците и ќе ги процени и можностите на современото оружје и специјалната опрема.
Извор: www.aa.com.tr
