ИСТАНБУЛ (АА) – Министерот за одбрана на Украина, Олексеј Резников, на состанокот рано утрово со развивачите и произведувачите во земјата рече дека развојот на украинскиот пазар на беспилотни летала е клучна област од работата на неговото министерство, пренесува Анадолу.
„Повторувам, независноста на воената индустрија е еден од елементите на одбранбената способност на земјата. И во моментов, една од клучните насоки на Министерството за одбрана е развојот и поддршката на украинскиот пазар на беспилотни летала“, рекол Резников, се наведува во соопштението на Министерството.
Резников нагласил дека од клучно значење е поддршката на украинскиот пазар на беспилотни летала, особено преку дронови со широк опсег на примена, во воздух, копно и вода.
„Се работи за приспособување на артилеријата и за нанесување штета на непријателот [дронови за напад] и за испораката на воена опрема, евакуација на повредени и слично“, истакна тој.
Украинскиот министер, исто така, нагласил дека потребите на украинските одбранбени сили се мерат со стотици илјади беспилотни летала „со различни модификации“.
„Работата на затворање на овие потреби продолжува. Конкретно, за време на осуммесечната војна во полни размери, ставени во функција беа повеќе беспилотни летала отколку во последните 5 години“, рече тој.
Во соопштението се додава дека Резников им предал сертификати за регистрација за стандардни продукти на голем број производители, дозволувајќи тие производи да ги користи војската.
Извор: www.aa.com.tr
